Al Liamm niverenn 431

Ur wezenn Nedeleg gwenn ha du war golo niverenn ziwezhañ ar bloaz... evit ur Vreizhadezig a raio ur veaj vras kontet gant D. Siberil e danevell Merry Christmas, Annaig! Kalz a genskoazell a vo kavet en istor Ur sac’hig te a dremen kostez an aod e Bro-Dreger savet gant G. Briand. E-keit-se ez eus teneridigezh etre ur verc’h hag he mamm e Begad avel ebet gant Mai Ewen. E Kemper e c’hell ar straedoù bezañ dañjerus ha degas souezh hervez Jil Penneg en e istor Angélique Taleg hag ar blenier bus.

Frondoù ar bleunioù a zo e-leizh gant Louzeier hud, louzoù ma zud, barzhoneg savet gant Y. Guillamot. Da heul eo Peñse a ra P. Tabuteau e-keit m’emañ F. Ar Morvran o kinnig e Enez Vihan.

Loig Kampion en deus skrivet ur marvailh diazezet war 6 ger a ranke implijout dre ret. E kamp KEAV oa bet skrivet Al labous e bigos aour.

E-touez ar skrivagnerien puilh o barzhonegoù emañ Fañch Peru. Plijout a ra din kontañ darvoudoù emezañ er rann Skrivagnerien.

1914-1918 : e brezhoneg... pa garont ! Sed un digarez da E. Hupel da lakaat war-wel a bep seurt dielloù, reoù anavezet ha reoù n’int ket. Brezhoneg a veze implijet evit broudañ ar Vretoned da fiziout o arc’hant en Amprest difenn ar vro da skouer.

Limerick, ur gêr en Iwerzhon, ya evel-just ! Hag un doare da varzhonegañ ivez a zispleg M. Bouessel du Bourg. Nebeut anavezet e broioù zo met pleustret kalz muioc’h er broioù saozneger. Fent a gaver en tammoù barzhonegoù berr-se, reolennoù strizh ha spered digabestr ganto.

Emgav gant levrioù liesseurt er rannoù A-dreuz lenn ha Petra nevez? 12 levr evel niver mizioù ur bloavezh. Ha 10 pajennad a Notennoù liesdanvez a zegaso preder ha keleier liesliv evit klozañ bloavezh 2018.

Laouen eo skipailh AL LIAMM o hetiñ deoc’h BLOAVEZH MAT !