Al Liamm niverenn 459

Doujusoc’h-doujusañ eo Bugale-den ouzh ar gwez. Skevent ar bed int ha ne vank politikour pe bolitikourez ebet bezañ poltredet o plantañ ur wezenn bennak evit dazont ar blanedenn hag ar vugale. A-viskoazh o deus ar gwez maget ijin Mab-den padal ne ouier ket kalz a dra diwar o fenn! Setu m’en deus skipailh Al Liamm bet c’hoant da veskañ selloù eus an amzer-dremenet hag an amzer a-vremañ diwar-benn “hor c’hoarezed”.

Divizoù puilh he deveze Anjela Duval gant ar gwez hag he endro, kement-se a c’heller lenn en he barzhoneg Nevezamzer. Annaig Kervella a ra war-dro gwez he liorzh ha setu m’eo bet difoupet un toullad Haiku evit ar gwez. E Kanenn an dervenn gozh war ar run tronoz an drastadenn veur e selaouer kounnar ar gwez en hor c’heñver diwar bluenn Herve Gouedard.

Ur bazenn e bed ar faltazi a reer gant Loeiza an Duigou a ginnig deomp An ivinenn, hegarat ha pasianted ganti! Feulsoc’h eo bed Jerom Olivry gant Dervenn, dervenn, dervenn! a lakao al lennerien da skrijañ. Per Denez a ginnig ur rekipe gant fent ha mousfent kement ha gant krizder E klorenn ur sitrouilhenn, al lenner a c’hoarzho… glas! Penaos bezañ ur skrivagner brudet ha karout ar gwez? Sed ar pezh a zispleg deomp Herve Gouedard e-barzh An den a oa pitilh gant ar gwez. Ne blij ket da Jani tech he gwaz da ziskar pep tra, Ronan Huon en e zanevell Ar gwez avaloù a zeskriv ur mare ma oa diouzh ar c’hiz diskar gwez e-ser degas sklêrijenn war ar plantadegoù.

Hor c’hoarezed ar gwez eme Malo Bouësel du Bourg, gant karantez en deus gouestlet ul levr dezhe. Eus he zu, Soaz an Tieg a laka war wel pegen sot e oa ar skrivagner Kastellbriant gant ar gwez.

Tapit an niverenn, kit er maez, ha lennit anezhi e disheol ho kwezenn muiañ-karet!

Annaig K/